Coach Britt mapasigarbuhon legasiya uban sa USC Warriors

CEBU, Philippines — Isip usa ka banggiitang coach, daghan na siya og titulo nga nadaog apil na niini ang talagsaon "grandslam" uban sa San Beda Red Cubs sa NCAA juniors division gikan niadtong 2010 ngadto sa 2012. Gani ang kahanas niya sa coaching nagdala kaniya sa langyaw'ng lapyahan diin siya nagsilbeng head coach sa Indonesia U18 national team ug Laskar Dreya South Sumatra sa the ASEAN Basketball League (ABL), ug dayon sa Sarawak Basketball Association didto sa Malaysia.

Pagbalik niya sa nasud, nag-coach siya sa Bulacan Kuyas sa Maharlika Pilipinas Basketball League (MPBL). Siya maoy head coach sa Zamboanga Family's Brand Sardines sa wala pa mahunong ang aksiyon sa MPBL gumikan sa kalibutanong pandemiya niadtong Marso.

Apan sa tanang dungog niyang naangkon, gikonsiderar sa tadhang Cebuano basketball coach nga si Britt Carlo Reroma ang makasaysayanon niyang kampanya sa University of San Carlos (USC) Warriors tunga sa dekada na ang milabay nga maoy iyang gihandum og maayo. Ang pagtimon sa USC Warriors ngadto sa labing una nilang korona sukad niadtong 1958 maoy kinatas-ang bahin sa iyang kalampusan.

Niadtong Oktubre 20, 2015 sa Cebu Coliseum, ang Warriors, ubos sa paggiya ni Reroma, mibihag sa University of the Visayas (UV) Green Lancers, 64-53 sa deciding Game-5 sa 15th Cebu Schools Athletic Foundation, Inc. (CESAFI) Finals aron bisbisan ang 57 ka tuig nga huwaw sa titulo sa USC.

Ubos sa pagpangu sa Cameroonian nilang import nga si Shooster Olago ug team captain Nico Magat, ang laing mga sakop sa USC Warriors 2015 CESAFI champion team mao sila si Kiefer Lim, Gio Laguyo, Rhyle Maconocido, Bosoy Bensig, Dolan Adlawan, Kevin Oleodo, Mavi Suarez, Charles Pepito, William McAloney, Ian Ortega, Victor Rabat ug Ian Tagapan.

"It is one of the best feelings that you had been part of history. Your legacy will always be there," matud pa ni Reroma. "There's that feeling of gratitude to the school that they gave you a chance to lead the team."

Gawas sa ilang kakugi ug teamwork, si Reroma mipaambit nga ang ilang pagtratar sa usa'g-usa isip usa ka pamilya maoy laing hinungdan sa kalampusan nga iyang natagamtaman niadtong panahona.

"We respect, care, and love each other. It is really a family and team effort from each one of us from the first person until the last person. I want to acknowledge everyone that has been part of that history. We did it all," sumala pa ni Reroma, kansang assistant coaches niadtong tungora mao sila si Bong Abad, Teroy Albarillo, Ron Vivar, Jabby Bautista, ug Bernie Ursal.