Bucks nanirado sa ilang praktisanan

CEBU, Philippines — Ang Milwaukee Bucks maoy labing uwahing NBA team nga nanirado sa ilang praktisanan taliwala sa nagpadayong coronavirus testing sa tanan niining mga sakop. Sa sayo pa, ang Los Angeles Clippers, Denver Nuggets ug Miami Heat misira sab sa ilang pasilidad human ang pipila nila ka mga magduduwa ang nagpositibo sa virus.

Matud pa sa ESPN nga gikandaduhan sa Bucks ang ilang pasilidad human madawat ang resulta gikan sa COVID-19 tests nga gipahigayon niadtong Sabado.

Wala hinuo'y klaro kon pila ka buok sakop sa Bucks ang nataptan sa maong gikahadlokang sakit.

Ang team gikataho nga dili motugot sa ilang players nga mag-training og balik hangtod nga sila mobiyahe karong Biyernes padung sa Orlando, Florida diin tiwason sa liga ang nahunong niining season sugod karong Hulyo 31.

Ang Bucks maoy nagkupot sa labing nindot nga 53-12 record sa wala pa gisuspenso sa liga ang kasamtangan niining season gumikan sa kalibutanong pandemiya. Sa ilang pag-abot sa Orlando, ang Bucks naglaraw sa labing una nilang NBA title sukad niadtong 1971.