Didal puwede nang mag-training

CEBU, Philippines — Mapasigarbuhong gipahibalo ni Philippine Sports Commission (PSC) officer-in-charge Ramon Fernandez ang Sugboanong skateboard champion nga si Margielyn Didal puwede nang magsugod og training pangandam sa iyang damgo nga makaangkon og luna sa Tokyo Olympics sunod tuig.

Kini human ang Inter-Agency Task Force (IATF) mihatag na og pagtugot sa mga national athletes nga mi-qualify na ug niadtong duna pa'y tsansa nga mo-qualify sa Olympics nga magpadayon sa ilang training sa mga dapit ubos sa General Community Quarantine (GCQ).

Apan kay si Didal nagpuyo man sa Dakbayan sa Sugbo nga gipaubos pa karon sa Enhanced Community Quarantine (ECQ), si Fernandez mipadayag nga ang reigning Asian Games ug Southeast (SEA) Games skateboarding queen mahimong magbansay-bansay sa mga silingang lungsod ug siyudad ubos sa GCQ.

Si Didal nga maoy nanghawod sa  Asian Championship 2020 Online Skate Lockdown Video Competition dili pa lamang dugay, nagdanga-danga na aron makabira og luna sa Tokyo Summer Games.

“IATF told us she (Didal) can now train in areas under GCQ,” matud pa ni Fernandez segun sa taho sa The Philippine STAR.

Sa kasamtangan, si Didal mibaid sa iyang abilidad sa hinimo nga pasilidad sa karpentero niyang amahan nga si Lito gawas sa ilang balay didto sa Barangay Lahug.

Sukad masukad, problema nang daan ni Didal ang eskena nga walay skate park dinhi sa Sugbo. Apan bisan pa man sa mga hagit nga mihamok sa iyang dalan, si Didal malaumon nga makarepresentar siya sa nasud sa Olympics.