Simmons nagpanikad na moduwa'g balik
CEBU, Philippines — Ang All-Star guard sa Philadelphia 76ers nga si Ben Simmons nagpanikad sa pagbalik sa aksiyon sa NBA ning bulana.
Human nahunong sud sa upat ka bulan tungod sa kalibutanong pandemiya, tiwason sa NBA ang 2019-2020 niining season sugod karong Hulyo 31 didto sa Disney World sports complex sa Orlando, Florida.
Gikan sa katloan, 22 na lang ka teams ang magkumbati sa nahibiling bahin sa season, apil na niini ang Sixers ni Simmons.
Samtang nagkaduol ang gikatakdang pagsugod og balik sa liga, si Simmons gibati og tumang kahinam nga makataak og balik sa korte.
Si Simmons wala na makaduwa pa sukad niadtong Pebrero 22 human maangol ang ubos nga bahin sa iyang likod atol sa ilang sangka batok sa Milwaukee Bucks, apan nabalik na karon ang kapiskay sa iyang panglawas.
"I'm feeling better than I was when I started this season," matud pa sa 23-anyos nga si Simmons. "Overall, feel like I'm back to 100 percent. It's a good feeling."
Mapasalamaton si Simmons sa taas nga lockdown kay nakahatag kini kaniya og igong panahon alang sa iyang rehabilitasyon.
Sa wala pa mahunong ang season niadtong Marso 11, si Simmons mi-average og 16.7 points, 7.8 rebounds, 8.2 assists ug 2.1 steals matag duwa.
- Latest