Laing player sa Heat positibo sa virus

CEBU, Philippines — Giundang sa Miami Heat ang ilang workouts didto sa ilang praktisanan sa American Airlines Arena human ang ikaduha nilang player nagpositibo sa coronavirus.

SEgun sa taho sa Fort Lauderdale Sun Sentinel kagahapon, nga ang Heat padayon nga mo-test sa ilang players kausa sud sa duha ka adlaw sa dili pa sila molarga karong Hulyo 8 didto sa Orlando diin tiwason sa NBA ang nahunong niining season.

Gumikan ning labing uwahing hitabo, ang Heat dili na mopahigayon og indibidwal nga training session alang sa ilang players didto sa ilang pasilidad nga ilang gikandadohan sa pagka karon.

Wala hinuon nganli sa Heat ang ikaduha nilang player nga nataptan sa makalisang nga sakit, apan gitaho sa Sun Sentinel nga kabahin siya sa First 5 sa team.

Ang Miami nakigduyog karon sa Denver Nuggets ug Los Angeles Clippers sa listahan sa mga teams nga mihunong sa ilang individual workouts sa ilang pasilidad human nagpositibo sa Covid-19 ang pipila nila ka mga players.

Ang aksiyon sa NBA gikatakda nga magsugod og balik karong Hulyo 30 didto sa Disney World sports complex sa Orlando diin 22 ka teams ang mag-ilog sa 16 ka luna sa playoffs nga magsugod karong Agosto 17.