Alelu Flores milab-as sa iyang panahon isip tamaraw uban ang damgong wa'y pagkahupas

CEBU, Philippines — Ang Sugboanong basketbolista ug coach nga si Paul Alelu Quiapo Flores milab-as sa mabungahon niyang kagahapon uban sa Far Eastern University (FEU) Tamaraws diin sila nakadaog og duha ka sagunson nga kampiyonato niadtong 2004 ug 2005 season sa University Athletic Association of Philippines (UAAP).

Gawas nga nanghawod sa UAAP, ila sab nga gidominar ang University Games didto sa Bacolod City ug ingon man ang prestihiyosong Philippine Collegiate Champions League (PCCL) nga maoy inahan sa tanang korona nga ilang nabira niadtong higayona.

Nahimong mas espesyal ang FEU Tamaraws national champion team niadtong 2004 ug 2005 gumikan kay siyam sa ilang mga sakop ang nakatikang sa PBA ubos sa pagpangu sa ilang alas ug team captain nga si Arwind Santos nga nahimong sumpay sa pusod nga higala ni Flores.

Lain pang kauban ni Flores nga nalandig sa PBA mao sila si Jeff Chan, Mark Isip, Jonas Villanueva, Benedict Fernandez, Francis Barcellano, Eder Saldua, Denok Miranda ug Ryan Joseph Rizada.

Isip role player sa Tamaraws, duna sa'y dili mahikalimtan nga salida ang 37-anyos nga si Flores.

Sa Game-2 sa 2004 UAAP Finals, si Flores miplastada og hugot kaayong depensa hinungdan nga si La Salle star Macmac Cardona wala makaiskor sa ikaduhang kuwarter, samtang siya nakatali og singko puntos.

Sa ikadunang hugna sa 2005 UAAP season, mikadlit siya walo ka sunod-sunod nga puntos sa naghinapos nga bahin sa duwa nga miresulta ngadto sa pagkatumba nila sa UST Tigers. Nahimo siyang best player of the game niadtong tungora. Si Flores miangkon nga sama sa ubang players, nagdamgo sab siya nga makataak sa PBA. Apan wala mipabor kaniya ang kahigayonan gumikan kay pipila ka semana human sila nakampiyon sa UAAP, nasakit ang iyang inahan nga si Rosario Charito.

Kay sige ma'g larga ang iyang amahan nga si Romeo Sr. isip seaman ug siya maoy kinamagulangan sa upat ka managsuon, si Flores napugos pagpauli og balik sa Sugbo aron atimanon ang iyang inahan ug mga igsuon.

Balik lantaw sa iyang kaagi, si Flores wala magmahay nga iyang gipili ang iyang pamilya kay sa iyang karera sa basketbol.

Alang ni Flores, dili kinahanglan nga mamahimo kang usa ka PBA player aron padayon kang mosidlak isip basketbolista ug makatandog sa kinabuhi sa uban.

"You don't have to be a PBA player or a superstar if you want to serve the sport of basketball. If you are  just true and sincere with what you are doing, the feeling is very fulfilling," matud pa ni Flores nga maoy kasamtangang coach sa Consolacion Sarok Weavers. "Like me, I've been enjoying serving basketball enthusiasts through organizing leagues, conducting clinics, and coaching young players in our team." Kabahin sa iyang damgo nga mag-PBA, si Flores nagkanayon nga usa kini ka butang nga padayon niyang handumon sa kinabuhi. Nanghinaut si Flores nga usa sa iyang mga anak ang makakab-ot sa iyang ambisyon ugma damlag.

"My dream of playing in the PBA will remain an unfinished business for me. I just hope that someday one

of my children will try to reach that dream that was well within my grasp had it not been for life's circumstances

that came my way," dugang pa ni Flores.