Online dancesports, chess tourneys karong adlawa
CEBU, Philippines — Padayong mikisaw ang Cebu sports ning panahon sa kwarantin pinaagi sa mga online tournaments.Dili lamang usa, apan duha ka events ang gikatakda karong adlawa. Una mao ang senemanang online grassroots dancesport competition nga gipasiugdahan sa Cebu City Sports Commission (CCSC) ubos sa liderato ni chairman Edward Hayco. Magsugod ang ikid-ikid sa alas-2 sa hapon.
Si Dancesport-Team Cebu City head coach Loloi Rendon nagkanayon nga ilang gilimitahan ang mga partisipante kay tingali'g dili nila matiwas ang torneyo sa susamang adlaw kay nagkat-on pa man sila ning gigamit nilang teknolohiya.
"We are trying to have 50 competitors for now from different barangays," matud pa ni Rendon. Gipaabot nga mowadwad sa ilang abilidad ning indigay sa sayaw mao ang mga mananayaw gikan sa Labangon, Tejero, Tisa, Punta Princesa, Guadalupe ug City Central School. Matud pa ni Rendon nga ang ilang mga latin ug standard champions ug senior dance teachers maoy magsilbeng mga judges.
Sa laing bahin, ang ikaupat nga hunat sa binulan nga Stay at Home Chess Challenge nga giulohan og 'Bounty' edition kumbatihan sab karong hapon. Ang duha ka oras nga pinug-anay sa utok nga gipaluyohan sa Sunshine Almonds ni Ralph Palmeri duwaon sa lichess.org sugod sa alas-5 sa hapon.
Si event organizer International Master Kim Steven Yap sa Cebu School of Chess (CSC) mipahibawo nga kadtong makapilde ni IM Oliver Dimakiling makadawat og P200 nga insentibo. Dul-an sa P30,000 nga ganting salapi ang iapud-apod sa mga top finishers.
- Latest
