5 pa ka nba players positibo sa COVID

CEBU, Philippines — Dugang lima pa ka NBA players ang nagpositibo sa Covid-19, usa ka bulan sa dili pa ang gikatakdang pagsugod og balik sa liga didto sa Disney World Resort sports complex sa Orlando, Florida.

Apil niini ang sentro sa Brooklyn Nets nga si DeAndre Jordan ug ang iyang teammate nga si Spencer Dinwiddie.

Tungod sa nahitabo kaniya, si Jordan misuwat sa iyang Twitter nga dili na siya motiwas pa og duwa sa nahibiling bahin sa nasuspenso nga season gumikan sa pandemiya.

Wala pa hinuo'y klaro kon sama ba sab ang pagabuhaton ni Dinwiddie, kinsa nasuta nga nataptan sa maong sakit human gihilanat ug mihuot ang iyang dughan.

Kagahapon, ang New Orleans Pelicans mipahibalo nga duna sila'y tulo ka players nga naigo sa gikahadlokang virus.

Nagdumili hinuon si David Griffin, ang bise presidente sa Pelicans paghingan sa mga players. Giseguro hinuon ni Griffin nga nagkwarantin na ang ilang mga sakop nga nataptan sa virus.

Sa laing bahin, gisirad-an sa Denver Nuggets ang ilang pasilidad alang sa praktis human pipila ka sakop sa 35 ka tawo unta nilang delegasyon padung didto sa Orlando nagpositibo sab sa virus.