Boksing sa California balik na, sugbuanong si Gesta mosalida
CEBU, Philippines — Kon wa'y mga kakulian, si Mercito 'No Fear' Gesta ((32-3-3, 17KOs) mahimong labing unang Sugboanong boksidor nga moaway sukad sa lockdown niadtong Marso gumikan sa kalibutanong pandemiya.
Apan ang garbo sa Labogon, Mandaue City angayan nga mangandam sa usa ka dakong gubat gumikan kay iyang hagiton mao man ang wa'y pildeng World Boxing Council USNBC lightweight champion nga si Hector 'El Finito' Tanajara Jr. (19-0, 5KOs) sa Texas karong Hulyo 24 didto sa Fantasy Springs Resort Casino sa Indio, California.
Gipasiugdahan sa Golden Boy Promotions ni Oscar de la Hoya inabagan sa DAZN ug Fantasy Springs, ang maong promosyon diin si WBA Gold welterweight champion Vergil Ortiz Jr. (15-0, 15KOs) modepensa sa iyang bakus batok ni Samuel Vargas (31-5-2, 14KOs) sa main event maoy momarka sa pagbalik sa pro boxing didto sa habagatang California human sa upat ka bulan nga pagkamingaw.
“I am so excited to fight on July 24 against a talented, young, and very technical boxer in Hector Tanajara Jr,” matud pa sa 32-anyos nga si Gesta nga gipasidunggang WBC 'Hero of Humanity' gumikan sa pagpanghatag niya og ayuda sa mga frontliners didto sa San Diego diin tua na karon siya nakabasi.
Si Gesta mibutyag nga nag-conditioning training siya online uban sa iyang kampo didto sa San Diego, apan karon atua na siya sa Los Angeles nag-training uban ni coach Marvin Somodio ug sa iyang amahan didto sa Wild Card Gym ni Hall of Fame trainer Freddie Roach.
"Even though the fight will be different this time because there will be no audience, friends or family, I’m well prepared and will put on a great show against Tanajara Jr.," sumala pa ni Gesta.
- Latest
