Im dimakiling puntarya sa Cebu players

CEBU, Philippines — Ang mga mata sa pipila ka tadhang Cebu players adto punting ni International Master Oliver Dimakiling sa ikaupat nga edisyon sa binulan nga Stay at Home Chess Challenge nga duwaon pinaagi sa lichess.org sa alas-5 sa hapon karong Sabado, Hulyo 4.

Matud pa ni event organizer IM Kim Steven Yap sa Cebu School of Chess nga ang duha ka oras nga torneyo nga gipaluyohan sa Sunshine Almonds ni Ralph Palmeri mas bibo ning higayona gumikan kay kadtong players nga makapilde ni Dimakiling makadawat og insentibo nga P200.

Apil sa naglaraw nga bihagon ang Boholanong si Dimakiling mao si defending champion Bryle Arellano, National Masters Rommel Ganzon, Edsel Montoya ug Rogelio Enriquez Jr., second edition champ Remegio Galenzoga, Allan Salientes, Joel Pacuribot, Antonio Cabibil, Richard Natividad ug International Arbiter Lincoln Yap nga mao kanunay ang top senior player.

Midugang si Yap nga ila sab gipadak-an ang premyo nga miabot na ngadto sa P30,000.

Ang makampiyon mobulsa og P3,000. Ang mopahiluna sa ikaduha ngadto sa ikalimang dapit makadawat og P2,500, P2,000, P1,500, ug P1,000.

Ang top 3 female mokabi og P1,000, P500 ug P400, samtang ang top 3 kiddies mokubra og P1,000, P400 ug 300.

Ang entry fee nagkantidad og P100. Kadtong gusto moapil gihatagan kutob lamang karong Hulyo 2 aron magparehistro. Alang sa dugang detalye mahimong mokontak ni IM Kim Yap sa 0977-6864660 o m.me/kimsteven.yap.