Sugboanong jins misidlak sa Smart/MVP online poomsae tourney

CEBU, Philippines — Pipila ka mga Sugboanong taekwondo jins ang mihimo og kasikas human milabni og mga medalya sa 2020 Smart/MVP Sports Foundation National Taekwondo Poomsae Championships nga gipahigayon dili pa lamang dugay pinaagi sa online.

Nangu sa pag-arangkada sa mga Sugboanon mao si Philippine team member Aidaine Laxa nga mipugnit og silver sa women's division.Si Laxa miposte og 8.150 puntos aron pagpahiluna sa ikaduhang dapit sunod sa iyang teammate sa University of Sto.Tomas (UST) nga si Jocelyn Ninobla, nga mitali og 8.333 puntos aron angkonon ang bulawang medalya.

Bisan tuod og ang torneyo gipahigayon online, apan si Laxa nagkanayon nga daw sama gihapon kini sa usa ka aktuwal nga kompetisyon.

“Same ra man ang feeling. Same ra pud na warm-up ang akong gibuhat nga mura kog nag-actual competition gyud. Same ra pud ang all out sa performance na akong buhaton if actual competition gyud. Ang difference lang kay walay referee ug audience dili ra gyud kaayo ingon ana kakulba,” matud pa ni Laxa.

Sa ubang dibisyon, ang Toledo Taekwondo Team nakalabni og duha ka golds, usa ka silver ug usa ka bronze.

Sila si Valerie Odhelle Patalingjug (yellow male cadet) ug Maria Avril Nim Rivera (yellow female 10-11 age group) maoy naka-gold, samtang si Gianna Arnaiz mitunol og silver sa yellow female 10-11 class.

Sila si Lorraine Fernandez ug Clarrisa Louise Gallego mipugnit og tagsa ka bronze sa blue belt 9-11 class ug brown belt 9-below category.

Mipakitang gilas sab ang StarLava pinaagi ni Roldjan Client Lebumfacil Ylanan nga naka-silver sa junior brown belt ug Nino Jan Alvin Cabanig nga mikabkab og bronze sa red belt 9-11 division.