Brian shaw mo-coach ni Kai Sotto

CEBU, Philippines — Kon ang dagan sa iyang karera maoy hisgutan, anaa sa maayong mga kamot ang higanteng Pinoy nga si Kai Sotto gumikan kay ang mo-coach kaniya sa NBA G-League mao man si Brian Shaw, usa ka beterano sa NBA, kansang karera milanat  og 14 ka tuig.

Segun sa taho ni Shams Charania sa The Athletic, ang kanhi pointguard sa Los Angeles Lakers maoy mogiya sa G-League team nga naglangkob sa mga top high school recruits sa Amerika, apil na ang 7-foot-2 nga si Sotto ug si Fil-Am Jalen Green. Ubos sa pagtimon ni Shaw, makauban nilang Sotto ug Green sila si Isaiah Todd ug Daishen Nix.

Ang 18-anyos nga si Sotto naglaraw nga mamahimong labing unang Pinoy nga makaduwa sa NBA.

Tataw nga anaa sa maayong direksiyon ang damgo ni Sotto ubos ni Shaw nga usa ka solidong kauban nilang Shaquille O’Neal ug anhing Kobe Bryant sa dihang ang Lakers naka-grandslam sa NBA niadtong 2000 ngadto sa 2002.

Ang 24th overall pick niadtong 1998 Draft, ang 54-anyos nga si Shaw nakaduwa sab uban sa Boston Celtics, Miami Heat, Orlando Magic, Golden State Warriors, Philadelpia 76ers ug Portland Trail Blazers sa wala pa mag-coach niadtong 2005.

Nahimo siyang assistant coach sa Lakers niadtong 2005-2011 ug 2016-2019. Na-assistant coach sab siya sa Indiana Pacers sud sa tulo ka tuig (2011-2013) sa wala pa mitapon sa Denver Nuggets nga maoy katapusang team nga iyang giserbisyohan sa NBA.