Arum nanghinaut fans mabalik na karong Septiyembre

CEBU, Philippines — Nanghinaut si Top Rank Inc. promoter Bob Arum nga makabalik na ang fans sa mga boxing events karong Septiyembre.              

Ang beteranong promoter nga si  Arum maoy utok sa pagbalik sa kalibotan sa boksing taliwala ning pandemya ug gani duna na siya'y duha ka promosyon nga nakalinya karong bulan didto sa Las Vegas.

Apan pulos 'closed door' ang iyang gipasiugdanan nga mga kalihukan. Laktod pagka sulti, dili puwedeng makatan-aw ang mga fans sa mga away sud sa binyu.

Malaumon hinuon si Arum nga sa hinay-hinay mabalik na ang mga fans sa limitadong kapasidad sud sa binyu tulo ka bulan gikan karon.

Mao kini ang gipanglantawan ni Arum sa gikatakda niyang promosyon karong Septiyembre diin mag-abot sila si lightweight champion Vasyl Lomachenko ug Teofimo Lopez sa usa ka unification bout.

"That’s going to be one of our September cards, where we're going to be open to, hopefully, spectators," matud pa ni Arum segun sa taho sa ESPN.

Lain pang gisaytan nga ipasundayag ni Arum mao ang ikatulong sangka nilang heavyweight champions Tyson Fury ug Deontay Wilder.  Ang duha ka higante gikatakda untang magsangka karong Hulyo 18, apan gisibog kini sa wala pa hisayring petsa gumikan niining kalibutanhong krisis panglawas.