'TikTok' dance challenge sa mga chess players
CEBU, Philippines — Ang Cebu South Chess Association (CESCA) nga gipangulohan ni Dennis Albinto nakakita og paagi nga hatagan og kalingawan ang mga magduduwa og ahedres nga nagpundo sa ilang mga balay taliwala nining pandemya. Dili pinaagi sa online tournament, apan pinaagi sa "TikTok" dance challenge nga abli sa tanang chess players sa nagkadaiyang dapit sa nasud.
"Amo ning gibuhat aron mahatagan og laing oportunidad ang mga chess players nga ipakita ang tinagoan nilang mga talento," matud pa sa CESCA sa opisyal nga pamahayag.
Buot ipakita sa CESCA nga ang mga chess players wala magpuyo sa laay nga kinabuhi ug duna sab sila'y kapasidad nga mopasundayag og laing talento.
"Usa mi ka chess association ug sa kanunay mipahigayon mi og online chess games," dugang pa sa CESCA. "Apan ning higayona nagpalahi mi aron ang mga chess players dunay lain nga kapahungawan sa ilang stress ning panahon sa pandemya." Kadtong mga interesado moapil gihatagan kutob lamang karong Hunyo 13 aron pagsumiter sa ilang TikTok videos ngadto sa Facebook page sa CESCA. Ang tanang mga entries i-post dayon sa FB sa CESCA. Kadtong entry nga dunay labing daghang 'heart' nga reaksiyon maoy isipon nga mananaog.
Ganting salapi ang ipaud-apod sa top 5 winners nga ipahibalo unya sa Hunyo 28.
- Latest
