PBA makapraktis na?

CEBU, Philippines — Depende kon unsay hukom sa Inter-Agency Task Force (IATF), ang mga PBA teams lagmit maka-praktis na og balik sud sa gym inig kahuman sa ikatulong paglugway sa kwarantin sa Metro Manila karong Mayo 31.

Kini gumikan kay ang Metro Manila Council nga naglangkob og 16 ka mga siyudad ug usa ka munisipalidad, gikataho nga morekomendar sa IATF nga i-downgrade na ang modified enhanced community quarantine (MECQ) ngadto sa general community quarantine (GCQ) sa National Capital Region. Ubos sa GCQ, dunay pipila ka mga sporting events nga gitugotan basta ang mga partisipante limitado lamang ngadto sa katunga sa kapasidad sa binyu.

Nindot kaayo kining maong kalamboan sa kadagkoan sa PBA nga naghinaut nga ang mga teams makabalik na sa ilang training ug uban pang mga  kalihukan sa labing dali nga panahon.

"Unti-unting balik sa normal ang plano ng gobyerno, at yun din naman ang tinitignan ng PBA," matud pa ni PBA commissioner Willie Marcial segun sa taho sa PBA.ph.

"First is the set of guidelines for the return to practice. Under the general community quarantine, allowed na ang gathering ng small group, so baka naman pwede na rin mag-work out ang team ng four or five players per session," dugang pa niya.

Nanghinaut si Marcial nga duna na silay mahimo nga mga kalihukan karong Hulyo, usa ka bulan sa dili pa ang krusyal nga miting diin ang PBA Board of Governors mohukom kon salbaron ba o kanselahon na lang sa hingpit ang Season 45.