Marcial mihimakak nagkasungi sila sa ABAP

CEBU, Philippines — Si middleweight boxer Eumir Felix Marcial nga nakaangkon og luna sa Olympics sayo ning tuiga didto sa  Amman, Jordan, mihimakak sa mga taho nga dunay miulbo nga wala pagkasinabtanay tali niya ug sa Association of Boxing Alliances in the Philippiines (ABAP).

Matud pa ni Marcial nga taas ang iyang respeto sa ABAP ug dili mahitabo nga mohimo siya og lakang nga makagusbat sa ilang relasyon.

Midugang ang 25-anyos nga Zamboangueno nga bisan og mikonsulta siya og ubang tawo kabahin sa iyang karera, iyang gipasalig nga ang ABAP maoy gusto niyang ikatumpang sa iyang misyon sa Olympics.

Gani si Marcial mibutyag nga mismo sila si ABAP president Ricky Vargas ug secretary-general Ed Picson ang mitabang kaniya sa mga negosasyon uban sa mga professional boxing managers aron pagseguro nga dili mabalda ang damgo sa Olympics.

“Alam ko naman na ang ikabubuti ko ang hangad nina Mr. Vargas at Sir Ed. Kanilang pag-aaralan ang mga alok, at ilalatag nila sa akin ang mga iyon at nasa akin pa rin ang huling desisyon," matud pa ni Marcial.

Sa iyang bahin, si Picson misaad nga dili sila mobabag ni Marcial kon ugaling makahukom kini nga mag-pro sa umaabot.

Si Marcial usa sa labing hayag nga paglaum sa Pilipinas nga molangkat sa gihandum niining labing unang gold medal sa Olympics sunod tuig didto sa Tokyo, Japan.