Tenorio wa'y puas ang pagtabang

CEBU, Philippines — Walay hunong ang pagtabang ni PBA star LA Tenorio niadtong mga labing apektado ning panahon sa krisis. Gikan sa pag-auction sa iyang mga sapatos ug uban pang mga mahinungdanong gamit pinaagi sa Facebook live, ang All-Star pointguard sa Barangay Ginebra nakatigum og P86,200.

Tipik sa maong kantidad idonar ni Tenorio ngadto sa mga empleyado sa PBA nga nawad-an og kapanginabuhian gumikan niining pandemya.    

"Ang dami talagang nangangailangan ng tulong sa mga panahong ito. May kakayahan naman tayong tumulong so ginagawa natin yung makakaya natin," matud pa ni  Tenorio segun sa taho sa PBA.ph.

Gawas niini, si Tenorio buot sab nga manghatag og pagkaon sa mga guwardiya ug utility sa upper deck diin ang Ginebra kanunay nga nagpraktis. Plano sab niyang mohatag og sinakong bugas sa Pasig Vice Mayor's Office.

"Maliit na halaga lang 'yung nakuha sa auction. Yung kakulangan, personal ko na lang. Masaya tayo basta nakakatulong," dugang pa sa garbo sa Ateneo.