Bavi miabag kawsa sa CESAFI

CEBU, Philippines — Makatakod gyud ang maayong binuhatan.

Nadasig sa gihimo sa Cebu Schools Athletic Foundation, Inc. nga mihatag og ayuda sa mga coaches, opisyales, support staff ug utility, ang Bounty Agro Ventures, Inc. (BAVI) nga maoy tiggama sa Chooks to Go miabag sa dalaygon nga kawsa sa liga.

Mismo si BAVI President Ronald Mascariñas ang mipahibawo nga modonar sila og 5,000 ka buok Bounty Fresh dressed chicken isip ilang hinabang sa CESAFI ning panahon sa krisis.

“We admire the efforts of CESAFI management in looking after the welfare of athletes and officials during this most difficult time. They are truly an inspiration,” matud pa ni Mascariñas. Ang mga manok iapud-apud sa 500 ka mga benepisaryo nga naglangkob og mga coaches, officials, referees, security guards, medics, gate ticket personnel ug utility crew members sa liga.

Sa miaging semana, silang tanan nakadawat og food basket nga dunay sud nga 10 ka kilong bugas ug mga delata kortesiya gikan sa Virginia Food Inc.

Si CESAFI Commissioner Felix 'Boy' O. Tiukinhoy, Jr. gibati og tumang kalipay human mahibaw sa kawang-gawa ni Mascarinas alang sa liga.

“The CESAFI is truly grateful and blessed at this pleasant surprise from Mr. Ronald Mascariñas, President of BAVI. CESAFI officials, coaches, referees, ballboys, janitors and other our support and utility teams are thankful for his generosity,” matud pa ni Tiukinhoy.

Sa iyang bahin, si USC President Fr.  Dionisio Miranda, SVD mipaambit nga ang maayong gawi makatakod gyud.

"Good example is contagious," kanayon pa ni Fr. Miranda. Sila si UV Athletic Director Chris Mejarito ug SWU-Phinma Cobras head coach Mike Reyes mipadangat sab sa ilang pasalamat ngadto ni Mascarinas sa malumo niiing kasingkasing ug pagpakabana sa isig ka tawo taliwala ning kalibutanhong pandemya.