Pacquiao mihinumdum labing lisud nga away

CEBU, Philippines — Samtang nagkwarantin taliwala ning kalibutanhong pandemiya, gihinumduman ni Pinoy ring legend Manny Pacquiao ang labing lisud nga away sa mabulukon niyang karera. Segun sa taho ni Quinito Henson sa The Philippine STAR, igsuong mantalaan sa Banat News, si Pacquiao mikumpisal nga ang labing lig-on niyang nakontra sa labing lisud nga away nga iyang nasugatan mao ang Mehikanong si Erik Morales.

Nahitabo kini atol sa una sa tulo niya ka away batok sa gibansagan nga "El Terible" niadtong Marso 2005 didto sa MGM Grand Garden Arena sa Las Vegas.

Si Pacquiao 26-anyos pa niadtong higayona, manghod og duha ka tuig ni Morales.

Mao kadto ang 'debut' ni Pacquiao ubos sa super featherweight division ug ilang giilogan ang bakantrng WBC International ug IBA titles.

Huego todo ug duguon kaayo ang ilang kumbati nga milanat og 12 ka hugna diin si Morales maoy midaog pinaagi sa unanimous decision sa parehong 115-113 nga iskor gikan nilang judges Chuck Giampa, Dave Moretti ug Paul Smith.

Hinuon, sa sunod nilang duha ka engkuwentro, wala na'y lalis kon kinsay ngilngig nilang duha human gikastigo ug gikulata ni Pacquiao si Morales nga miresulta ngadto sa pagretiro niini.