Pacquiao vs Crawford dad-on ni Arum sa Middle East o Macau
CEBU, Philippines — Masaligon kaayo si Top Rank big boss Bob Arum nga iyang maparang sila si Manny Pacquiao ug Terence Crawford nga ning sayo pa lamang duna na siya'y nahuna-hunaan sa maong eksplosibong engkuwentro.
Sa sayo pa, si Arum mipadayag nga malaumon kaayo siya nga iyang maselyado ang sangka tali sa duha ka banggiitang boksidor kon ugaling mabalik na sa normal ang sitwasyon.
Gani sa orihinal niyang plano mahitabo kini karon untang Hulyo, apan nausab ang iyang iskedyul gumikan sa pag-ulbo sa coronavirus pandemic.
Bisan pa man niini, napuno gihapon si Arum og pagsalig nga madayon ang buot niyang mahitabo kay interesado sab niini si Crawford ug ang kampo ni Pacquiao.
Mipahibalo na hinuon daan si Arum nga iyang ipahigayon ang higanteng sangka gawas sa Amerika.
Segun sa labing uwahi niyang pamahayag, buot niyang magpinaksitay sila si Crawford ug Pacquiao didto sa tunga-tungang sidlakan kon Middle East o dili ba didto sa Macau, China.
“I think the fight would have to take place outside of the United States,” matud pa ni Arum segun sa taho sa boxingScene.com. “The question is do we do it in the Mid East or outside of China in Macau, how quick would they be to open up? We’re working on it.
Ang 41-anyos nga si Pacquiao, kasamtangans naghari isip WBA Super welterweight champion, nagkupot siya og 62-7-2 record uban ang 39KOs, samtang si Crawford, 32-anyos ug maoy WBO welterweight champion, wala pa'y pilde sa 36 ka away diin 27 sa mga biktima niini iyang gipatikangkang.
- Latest
