Pacquiao gisaytan ni Spence

CEBU, Philippines — Nagtinguha si WBC/IBF welterweight champion Errol Spence  nga makasangka si Manny Pacquiao o dili ba ang wa'y pildeng WBO champion nga si Terence Crawford sa pagbalik niya og away nga iyang gilauman mahitabo karong Septiyembre o Oktubre.

Sa miagi niyang away, si Spence milampos pagdepensa sa kaluha niyang bakus human midaog pinaagi sa 'split decision' batok ni Shawn Porter niadtong Septiyembre  28   sa miaging tuig didto sa Staples Center sa Los Angeles.

Dose ka adlaw ang milabay, ang 29-anyos nga si Spence nakasinati og makalisang nga disgrasya human mabangga ang gisakyan niyang awto nga kusog kaayo niyang gipadagan didto sa Dallas.

Naluwas hinuon siya sa makuyaw nga kahimtang, apan wala siya makaaway sud sa pipila ka bulan tungod niini.

Si Spence nagplano unta nga mobalik og away karong Hulyo o Agosto, apan iyang kining giuswag gumikan sa coronavirus pandemic nga mipalukapa sa tanang sports events tibuok kalibotan ning panahona.

Bisan tuod og si WBC mandatory challenger Danny Garcia nagbarog sa iyang dalan, si Spence milista sa duha ka pangan nga gusto niyang engkuwentruhon sunod ug usa sa gisaytan niini mao si Pacquiao.

Si Spence miisip ni Pacquiao nga usa gihapon ka dekalibreng kontra bisan og nag-edad na kini og 40-anyos.

Timaan niini, si Pacquiao, ang WBA welterweight champion, impresibong midaog sa miagi niyang duha ka away batok ni Adrien Broner ug Keith Thurman.  "I didn't think he was going to look that good, I didn't think he was going to look like that," matud pa ni Spence segun sa taho ni Steve Kim sa ESPN.

"I would love to fight Pacquiao, he's a future legend, he's a Hall of Famer, he's a guy I would love to fight. He has a belt, too, I would love to get that belt," dugang pa niya.