NBA mopakanaog desisyon sa mayo pa
CEBU, Philippines — Gipahibalo kagahapon ni NBA Commissioner Adam Silver nga unya pa sa Mayo mopakanaog og desisyon ang liga kabahin kon unsay sunod mahitabo sa 2019-2020 niining season nga temporaryo nilang gisuspenso gumikan sa coronavirus pandemic.
"Essentially, what I've told my folks over the last week is that we just should just accept that, at least for the month of April, we won't be in a position to make any decisions," matud pa ni Silver sa usa ka interview nga gi-live streaming sa Twitter account sa NBA.
Ang NBA maoy labing unang pro sports league sa Amerika nga mihunong sa ilang mga duwa. Nahitabo kini niadtong Marso 11 human si Utah Jazz bigman Rudy Gobert nagpositibo sa COVID-19.
Kon wala pa mahunong gumikan sa virus, ang regular season sa NBA mahuman unta karong Abril 15. Ang playoffs sugdan sa Abril 18 padung na sa NBA Finals karong Hunyo.
Apan gumikan kay wala pa may kasiguroan ang tanan gumikan sa padayon nga pagkuyanap sa bag-ong coronavirus, si Silver miingon nga wala pa sila'y nakab-ot nga desisyon ning higayona.
Apil hinuon sa ilang gitimbang-timbang mao ang paghuman sa regular season ug ang posibilidad nga molahos na lang sila sa playoffs.
Tipik sab sa ilang plano mao ang pagpahigayon sa tanang mga duwa sa playoffs sa usa ka lugar ug ilang gisaytan nga binyu ang Las Vegas.
- Latest