Marcial wala pa'y klaro kon mag-pro

CEBU, Philippines — Wala pa'y klaro si Olympic middleweight qualifier Eumir Marcial kon mosud ba siya sa pro boxing sa umaabot.

Segun sa taho ni Quinito Henson sa The Philippine STAR, ang igsuong mantalaan sa Banat News, si Marcial miangkon nga duna na'y pipila ka mga bigtime promoters ang miawhag kaniya nga mag-pro, apan wala pa siya makahukom kabahin sa ugma sa iyang karera ning puntoha.

Nagkanayon si Marcial nga ang iyang una niyang prayoridad sa pagka karon mao ang pagbira sa labing unang gold medal sa Olympics.

Mao unta kini ang misyon ni Marcial sa 2020 Tokyo Olympics nga orihinal nga gikatakda karong Hulyo 24 ngadto sa Agosto 9, apan magpaabot pa siya og usa ka tuig human gisibog ang Olympics unya na sa 2021 gumikan sa COVID-19 pandemic.

Ang 24-anyos nga si Marcial miingon nga kon ugaling mag-pro boxer siya, usa kini ka lisud nga desisyon. "Right now, I'm not entertaining any offers," matud pa ni Marcial.  "I'm really not sure to turn pro. I don't know if it will mean sacrificing my lifetime work as a soldier with the Air Force."

Kon ugaling mag-pro siya, si Marcial moaway ubos sa super middleweight division nga dunay timbang nga 168   libras.