Aces mitabang sa gamay nilang paagi

CEBU, Philippines — Ang mga sakop sa Alaska Aces mihatag og tabang sa mga kababayan niining Pinoy taliwala ning coronavirus pandemic.

Human si coach Jeffrey Cariaso midonar og P100,000 alang niadtong mga trabahante nga naapektohan sa pagkasuspenso sa PBA season, sila si Vic Manuel ug Abu Tratter midalit sab og hinabang sa labing nanginahanglan.

Sila si Tratter ug Manuel nanghatag og pagkaon ug ingon man relief goods sa tagsa-tagsa nila ka lugar niadtong weekend nga sa makadiyot nakapahupay sa gibating kabalaka sa mga tawo ning pagkuyanap sa coronavirus nga nagkadaghan matag adlaw.

Si Manuel miapud-apod og packed lunch ug dinner sa mga guwardiya ug ingon man niadtong mga walay puy-anan didto sa Cainta, samtang si Tratter nanghatag og relief goods sa dili momenos 50 ka pamilya didto sa Laguna diin siya natawo.

Ang 32-anyos nga si Manuel nagpasalamat sa Ginoo sa proteksiyon niini aron pabiling luwas ang iyang pamilya.

Samtang ang 27-anyos nga si Tratter nagkanayon nga dili siya makaako nga magtan-aw lamang ug wa'y itunol nga tabang sa iyang mga katagilungsod ning panahon sa krisis.

"The fight against hunger was here before the pandemic and going to be hereafter," matud pa ni Tratter segun sa taho sa PBA.ph. "It's our responsibility to take care of those less fortunate, no matter how small you think it is."