Karera ni Pacquiao maapektohan

CEBU, Philippines — Sa edad nga 40-anyos, si Manny Pacquiao daw sa nanghuwam na lamang og oras aron padayonon ang karera niya sa boksing.

Apan sa pagtumaw ning coronavirus pandemic, hayan nga seguradong ma-apektohan ang iyang karera kay lagmit maghuwat usa siya og usa ka tuig sa dili pa makaaway og balik.

Sa katapusan niyang aksiyon, gikastigo ni Pacquiao si Keith Thurman niadtong Hulyo 20 sa miaging tuig didto sa Las Vegas.

Sukad niadto, daghan na kaayo ang mga pangan nga milutaw aron posibleng sunod niyang ikasangaka, apil na niiini sila si Floyd Mayweather Jr. ug Conor McGregor.

Naapil sab sa listahan sila si Mikey Garcia, Amir Khan, Errol Spence Jr, Danny Garcia ug Shawn Porter.

Bisan og wala pa'y klaro kon kinsa kanila ang makontra ni Pacquiao, ang Pinoy ring star nagtirada nang mobalik og katkat sa ring karong Hunyo.

Apan sa kalit lang nahugno ang tanang plano ni Pacquiao gumikan sa pagbuto sa COVID-19 nga hangtod karon wala pa'y kaseguroan kon kanus-a kini maundang.

Kon ugaling mabalik na sa normal ang tanan karong Mayo o Hunyo, hanap pa gihapon ang posibilidad nga maka-away si Pacquiao sa nahibiling bahin sa tuig.

Kini gumikan kay daghan pa man kaayo ang nakalinya nga boxing events nga giuswag gumikan sa pagkuyanap coronavirus.

Mao nang daghan ang nangapas nga kon dili man gani edad, hayan ang corona virus maoy maka-knockout sa karera sa boksing ni Pacquiao.