Water Market batok Sandal Brocker sa Power Forty finals

CEBU, Philippines – Moduwa na sab sa finals ang defending champion Water Market human makalingkawas sa Park 'N Go Bakeshop, 80-79 sa semifinals sa Power Forty Basketball Tournament 50-above Sinulog Cup niadtong Martes diha sa Inayawan Sports Complex, Dakbayan sa Sugbo.

Ang team captain nga si Caloy Lim maoy bayani sa kadaogan sa Water Market pinaagi sa iyang krusyal nga lay-up sa katapusang 10 segundos sa duwa.

Gawas sa iyang pagka-bayani, gipangulohan sab ni Lim ang kadaogan nga mihakot og 22 puntos.

Ang Water Market ni Vez Eleguin nakakuha sab og igong suporta gikan ni Bodak Tantiado nga mihabwa og 19 puntos ug Atan Diaz nga mikandos og 13 puntos.

Nangulo sa natagak nga Park 'N Go ni Romy Rama mao si Eduard Buhay nga mipabuhagay og 32 puntos, gisundan ni Eric Espinosa nga miposa og 26 puntos.

Sangkaon sa Water Market sa finals mao ang Sandal Brocker nga midaog sab pinaagi sa paglubong sa LJR Ventures, 103-79.

Kontrolado kaayo sa Sandal Brocker ang duwa ug wala gyud nila hatagi'g higayon ang LJR Ventures nga makalabaw sukad milansang og 28-15 sa first quarter.

Si Wewe Cabrera mirehistro og 26 puntos aron mangulo sa balanseng opensa sa Sandal Brocker ni Alex Sandal.

Sila si Alex Cabreros ug Jun Nacional mitimbre'g 16 puntos matag usa, samtang sila si Boy Allerta ug Echavez nagtampohay og 10 puntos.

Gipangulohan sab ni Ricky Dayondon ang gitagak nga LJR Ventures nga mikabkab og 22 puntos.

Ang team owner nga si Engr. Edwin Rabaya mikamada og 15 puntos.

Si Celso Cabaluna miambit og 12 puntos, samtang sila si Tony Ungria ug Atillo nag-amotay og 10 puntos sa naparot nga koponan.

Ang liga gidumala ni 'el presidente' Edwin Dejacto, inabagan nilang Tedy Cabanada, Talyo Tamara, Paw Dejacto ug Shaun Dejacto sa CEBRA.

PUNTOS MATAG USA

Unang duwa:

WATER Market (80) – Lim 22, Tantiado 19, Diaz 13, Fuentes 7, Dela Rama 6, Eleguin 6, Yosores 4, Ozon 3.

PARK 'N Go (79) – Buhay 32, Espinosa 26, Mosqueda 8, Ebrado 6, Gaviola 4, Pestaño  3.

Ikaduhang duwa:

SANDAL Brocker (103) – Cabrera 26, Cabreros 16, Nacional 16, Allerta 10, Echavez 10, Galagar 8, Capala 8, Sandal 5, Abasolo 4.

LJR Ventures (79) – Dayondon 22, Rabaya 15, Cabaluna 12, Ungria 10, Atillo 10, Sabandeja 7, Tudtud 3.