Jordan mihilak
CEBU, Philippines — Naghilak nga gihinumdum ni Michael Jordan ang gihulagway niyang "little brother" nga si Kobe Bryant atol sa emosyonal kaayong memorial service didto sa Los Angeles nga namungingi og mga bitoon agi'g paghandum sa NBA legend ug sa iyang anak nga si Gianna nga namatay uban sa lain pang pito ka tawo sa helicopter crash sa miaging bulan.
Matud pa ni Jordan nga sa pagpanaw ni Kobe ngadto sa laing kalibotan, tipik sa iyang pagkatawo ang nahanaw sab.
"When Kobe Bryant died, a piece of me died, and as I look in this arena, across the globe, a piece of you died," batbat pa ni Jordan samtang mga dagkong lusak sa luha midagayday sa iyang mga aping. "I promise you, from this day forward, I will live with the memories and knowing that I had a little brother. I tried to help in every way I could. Please rest in peace, little brother."
Ang public memorial nga giulohan og "A Celebration of Life for Kobe and Gianna Bryant", gipahigayon didto sa Staples Center diin gilingaw ni Kobe ang iyang mga fans sud sa 17 ka tuig.
Mahinungdanon kaayo ang maong 2/24 nga petsa didto sa Amerika kay ang No. 24 mao man ang jersey number ni Kobe ug ang No. 2 iyaha ni Gianna
Lain pang miyukbo ni Kobe mao ang kanhi niya teammate nga si Shaquille O'Neal.
"Kobe and I have pushed one another to play some of the greatest basketball of all time and I am proud that no other team has accomplished the three-peat the Lakers have done since Shaq-and-the-Kobe Lakers did it," matud pa ni O’Neal.
Apan ang makapabuak sa dughan nga mensahe gipadangat sa kapikas ni Kobe nga si Vanessa Bryant.
Matud pa ni Vanessa nga sa kalit nga pagkamatay sa pinangga niyang bana ug sa iyang anak nga si Gigi, daw sa nahugno sab ang tibuok niyang kalibotan.
"God knew they couldn't be on this earth without each other," sumala pa ni Vanessa. "He had to bring them home together."
- Latest
