LeBron miagak sa Lakers

CEBU, Philippines — Milansang og krusyal niyang itsa si LeBron James sa nahibiling 30 segundos sa duwa aron aswaton ang Los Angeles Lakers ngadto sa kulbahinam nga daog batok sa Boston Celtics, 114-112 sa NBA kagahapon didto sa Staples Center sa Los Angeles, California.

Human sa fade-away shot ni James nga maoy nakapalabaw sa Lakers sa hingpit, si Anthony Davis misilyo sa daog sa Lakers pinaagi sa pagpasud og tulo ka free throws sa katapusang 12 segundos.

Gitapos ni James ang duwa uban ang 29 puntos, siyam ka assists ug walo ka rebounds, samtang si Davis mitali og 31 puntos ug milangkat og 13 ka rebounds.

Si Jayson Tatum mipabuto og 41 puntos, apan nakawang ang iyang paningkamot sa habig sa Boston.

Naparot ang Celtics bisan ang tanan nilang starters miiskor og double figures. Si Daniel Theis midugang og 16 puntos ug siyam ka rebounds, si Marcus Smart dunay 14 puntos ug pito ka rebounds, samtang si Gordon Hayward mipaksit og 10 puntos,

apan wala makaigo bisan og usa sa lima ka gibuhian niyang 3-pointers.

Wala hinuon makapakita'g aksiyon ang All-Star guard sa Boston nga si Kemba Walker.

Sa laing duwa, si Coby White miabuhagay og 33 puntos alang sa Chicago Bulls nga nakasugakod sa career-high 53 puntos ni Bradley Beal aron pakagingon ang Washington Wizards, 126-117.

Si Zach LaVine mipupo og 32 puntos ug si Thaddeus Young mipuno og 25 puntos alang sa Bulls nga mipakgang sa walo ka sagunson nilang pilde.