Raptors miposte kinadak-an nilang daog

CEBU, Philippines — Si Kyle Lowry mipupo og 16 puntos ug mipasa og 11 ka assists sa dihang gilubong sa Toronto Raptors ang Indiana Pacers, 127-81 alang sa labing dako nilang daog sa kasaysayan sa ilang prangkisa.

Mihipos si Pascal Siakam og 21 puntos, samtang si Serge Ibaka miposa og 15 puntos ug 15 sab ka rebounds alang sa   Raptors nga mikadlit sa ikasiyam nilang sagunson nga daog ug ika-17 sa miagi nilang 18 ka duwa.

Masukod pa hinuon ang kabangis sa Raptors ugmang adlawa sa dihang ilang sangkaon si Giannis Antetokounmpo ug Milwaukee Bucks nga maoy haring gangis karon sa NBA.

Mangtas kaayo ang Raptors nga sa usa ka higayon naglabaw og 49 puntos.

Daghan pa ang misalida sa kampo sa Raptors. Si Matt Thomas mirehistro og career-high 17 puntos nga iyang gibubo tanan sa katapusang kuwater, si Terence Davis dunay 13 puntos, si Rondae Hollis-Jefferson miiskor og 12, samtang si Chris Boucher mitampo og nuybe puntos ug 11 ka rebounds alang sa defending champion nga wala na molingi pa sukad milansang og 63-32 nga labaw sa halftime.

Si Domantas Sabonis dunay 14 puntos ug 11 ka rebounds, si Aaron Holiday mitali og 14 puntos, samtang si Justin Holiday mikamada og 12 puntos alang sa Pacers nga wala  gyud makarekober  sukad sa bugnaw kaayo niining sinugdanan.