Carcar balik sa finals
CEBU, Philippines — Ang Carcar City Lechoneros mitikang og balik sa finals human gipalagpot ang Sibonga Pillars, 82-70 sa Gullas Cup: Vision 2020 Cebu 1st District Under 21 Basketball Tournament niadtong weekend didto sa Carcar City Sports Complex.
Si Jumar Bucao mipupo og 18 puntos, samtang si Leonilo Martorillas midugang og 14 puntos aron ituboy ang Carcar ngadto sa ikaduha nilang sagunson nga pagtaak sa kampiyonato.
Dako sab og natampo sa Lechoneros si Rey Alfeche nga mitali og 12 puntos.
Ang Carcar naglabaw lamang og dos puntos human sa tulo ka kuwarter, apan milusad og 23-13 rally sa endgame aron paglubong sa Sibonga og 12 puntos.
Sangkaon sunod sa Carcar mao ang defending champion Talisay City Aquastars o ang Minglanilla Archangels sa best-of-three championship series karong weekend.
Ang Minglanilla naka-angkon pa og laing kinabuhi human gipakuratan ang twice-to-beat Talisay, 75-73.
Si Ace Go maoy bayani sa Minglanilla uban ang 26 puntos, 11 ka rebounds, upat ka blocks ug duha ka steals. Miabag kaniya si Tristan Cabrera nga mikamada og 15 puntos.
- Latest