Santisima napukan

CEBU, Philippines —  Pakyas ang ALA Boxer nga si Jeo Santisima sa labing una niyang world title fight human siya gipaundang sa 11th round sa Mexican champion nga si Emanuel Navarrete kagahapon didto sa MGM Grand Garden Arena sa Las Vegas.

Ang maong sangka usa sa mga supporting bouts sa Tyson Fury-Deontay Wilder heavyweight showdown.

Si Santisima, kinsa nakahiagum sa ikatulo niyang pilde sud sa 22 ka sangka, isug nga milahutay bisan pa sa mga kusug nga atake ni Navarrete, apan nakabsan siya sa kusug sa 11th round nga maoy gipahimuslan sa Mehikano nga mirapido kaniya og kinumo. Naglisud pagsagang ug wala na karekober pa gikan sa bangis nga atake si Santisima nga nakapaaghat sa referee nga undangon ang sangka.

Si Navarrete (31-1, 27KOs) midepensa sa iyang WBO super bantamweight belt. Ang Mehikano miingon nga sayu unta niya nga mapaundang ang Pinoy challenger apan nagsakit iyang kumagko human usab sa iyang kusug nga pagkulata sa ulo sa ALA boxer.

“It took me a little more time than expected. I hurt him a couple of times during the fight, but I got to give it to him; he is a real Filipino warrior. He took a lot of punches and didn’t go,” matud pa sa Mehikano sa ESPN5. “I hurt my right thumb trying to knock him out, but I knew I was close to stopping him, so I had to keep going.”

Ang lumad nga taga-Masbate nga si Santisima midayeg hinuon ni Navarrete ug miingon nga daghan siya og nakat-onang leksyon sa labing una niyang world title shot. Misaad hinuon kini nga mamawi ug mubalik sa training aron subling makabalik isip world title challenger.

“Navarrete is a great champion, and I gave it my all to bring a world title back to the Philippines. I came up short, but I can hold my head high,” matud pa ni Santisima.