Mga bitoon sa San Miguel nag-anam kawala

CEBU, Philippines — Nag-anam og kawagtang ang mga bitoon sa defending All-Filipino Cup champion San Miguel Beermen.

Gumikan kay lain nilang  sinaligan nga si Terrence Romeo nakaangkon og injury   atol sa ilang tune-up game batok Alaska Aces niadtong Huwebes sa gabii didto sa kaulohan.

Si Romeo gikataho nga nakaangkon og ankle injury sa iyang tuong tiil dihang natakilpo siya atol sa usa ka play. Si Romeo miitsa sa atubangan ni JV Casio, apan nabitik ang tiil niini sa usa ka exercise equipment pagtugpa niini gawas sa korte nga nakaangol niini.

Wala pa matino kon    seryoso ang ankle injury sa high-scoring point guard.

"Pagkatapos ko tumira, natapakan ko yung parang bike na bakal. Pagstep ko, may tumunog eh," matud ni Romeo sa Spin.ph.

Si Romeo maoy ikatulong Beermen star nga nakahiagum og angol.

Una mao si JuneMar Fajardo human makaangkon og buak nga bukog sa iyang tiil ug dili kini makaduwa sa tibuok All-Filipino Cup.

Misunod ang shooter nga si Marcio Lassiter ug giingon nga dili kaduwa sa sayong bahin sa conference tungod sa buak nga ilong atol sa team practice. 

Kahinumduman, nga si Romeo  ang  Finals MVP sa miaging Commissioner's Cup  atol sa pagka-kampiyon sa Beermen batok sa TNT KaTropa.