Bosh nadismaya kay wala maaapil sa 'hof'

CEBU, Philippines – Wala gitago ni two-time NBA champion Chris Bosh ang iyang pagkadismaya dihang wala siya maapil sa mga finalists alang sa Naismith Memorial Basketball Hall of Fame ning tuiga.

Pito ka mga finalists ang ginganlan niadtong Sabado, apil na si anhing Kobe Bryant ug ingon man sila si Kevin Garnett sa Boston Celtics ug Tim Duncan sa San Antonio Spurs.

Si Bosh nga mitabang ni LeBron James ug sa Miami Heat paglangkat og duha ka sagunson nga kampiyonato sa NBA niadtong 2012 ug 2013 mipahungaw sa gibati niyang kayugot pinaagi sa Instagram.

"I'll just get ahead of it so you hear this from me. I'm disappointed, you know, the hall of fame thing came out and I wasn't a finalist... I'm disappointed that I didn't even get considered," matud pa ni Bosh sa iyang Instagram TV video nga milanat og unom ka minuto.

"I was really, really looking forward to be going in with this class," dugang pa sa 11-time NBA All-Star. "One of the things people like to say is 'Oh next year', what if there's not a next year? That's something that I think about every day."

Ang 34-anyos nga si Bosh, kinsa nakadaog og Olympic gold medal uban sa Team USA niadtong 2008 Summer Olympics didto sa Beijing, nakaduwa og 13 ka tuig sa NBA sul-ot ang uniporme sa Toronto Raptors ug Heat. Wala na siya makaduwa sukad niadtong 2016 gumikan sa problema sa iyang dugo.