Hugot nga duwa inig balik sa NBA

CEBU, Philippines – Namundo pa og kusog ang mga playoffs contender sa  NBA ug mipahulay kini human   malampusong 69th NBA All-Star Weekend.

Tungod niini,  gipaabot ang mas hugot nga kompetisyon ilabi na kadtong mga nagtinguha og luna sa playoffs sa pagbalik sa aksiyon karong Biyernes.

Ang bitoon sa Los Angeles Lakers nga si LeBron James miingon nga giandam na niya iyang kaugalingon sa mas makutas ug mas hugot nga kampanya ilabi na nga laraw nila nga magpabilin sa No. 1 seed sa Western Conference hangtod sa playoffs.

"Basketball is going to be the main thing and the main thing only," sumala pa ni James sa NBA.com.

"It feels good to be in a winning situation,” matud pa ni Lakers’ All-Star bigman Anthony Davis. "I think being No. 1 in the West, we have something good going over there in L.A. I'm excited about our team. I'm excited about our chemistry. I'm excited for the second half of the season and see what we can accomplish. We still have a lot to work on, but right now we're doing pretty fine.”

Ang reigning MVP ug superstar sa Milwaukee Bucks nga si Giannis Antetokounmpo gusto nga sayo nilang makandado ang topseed sa ilang dibisyon aron modako pa ang kompiyansa sa ilang koponan.

Laraw sa Bucks   nga mosakmit sa labing una nilang NBA finals appearance.

Gawas sa Bucks (46-8) ug Lakers (41-12), mas dako ang gibating presyur sa ubang koponan ilabi na kadtong nagkumpayot sa ikawalo ngadto sa ika-10 nga dapit sa standing.

Sa Western Conference, ang San Antonio Spurs (23-31) maningkamot og maayo aron makaapas  pa  sila sa playoffs, apan kinahanglan nilang maapsan ang No. 9 Grizzlies (28-26) ug  No. 8   Portland Trail Blazers (25-31).

Dili usab luwas sa No. 8 ang Orlando Magic (24-31) tungod kay ang   Washington Wizards (20-33) ug Chicago Bulls (19-36) nagtinguha man sab nga moilog sa ilang puwesto.