Carcar topseed, San Fernando mipakurat sa Talisay sa Gullas Cup

CEBU, Philippines – Giangkon sa Carcar City Lechoneros ang No.1 spot paingon sa semifinals, samtang ang San Fernando Spartans mipakurat sa defending champion Talisay City Aquastars sa Gullas Cup: Vision 2020 Cebu 1st District Under 21 Basketball Tournament niadtong weekend didto sa Carcar City Sports Complex.

Si Leonilo Martorillas mibahog og 26 puntos  aron pangulohan ang Carcar ngadto sa 100-81 paglubong sa Minglanilla Archangels.

Midonar si Jhevolks Navarra og 17 puntos, si Rey Alfeche dunay 15 puntos, samtang si Kyle Lauronilla mikimada og 13 puntos  sa Lechoneros nga maoy nanghawod sa eliminasyon bitbit ang 4-1 win-loss record.

Sa laing mga duwa, si Harvey Caño mikolekta og 20 puntos sa San Fernando nga mipilde sa  Talisay, 90-83, samtang si Ehman Suarez  miposa og 25 puntos  aron asawaton ang Sibonga ngadto sa 89-81 nga kadaogan batok sa Naga City Electrifiers.

Sa maong kadaogan, ang  Sibonga   nakapuwersa og triple-tie uban sa Talisay ug Minglanilla  sa  parehong 3-2 nga baraha. Sud na hinuon silang tanan sa Final 4 diin ang Sibonga makigharong sa Carcar ug ang Talisay makigtigi sa Minglanilla.