Jones Jr. hari sa slam dunk

CEBU, Philippines — Usa ka kulbahinam, apan kontrobersyal nga Slam Dunk Contest ang nasaksihan sa mga NBA fans kagahapon atol sa NBA All-Star showcase didto sa United Center sa Chicago.

Nasentro sa atensiyon sa mga fans ang init nga duelo sa hinansakay tali sa duha ka high-flyers nga sila si Aaron Gordon sa Orlando Magic ug Miami Heat guard Derrick Jones Jr., diin sa katapusan, si Jones Jr. ang gideklarar nga daog sa sikit nga 48-47 nga puntos gikan sa mga hurado.

Hinuon, daghan ang mga wala kauyon sa desisyon tungod kay nagtuo sila nga si Gordon ang angay nga mudaog ilabi na sa katapusan niyang dunk diin gilayatan niya ang 7-foot-5 center sa Boston Celtics nga si Tacko Fall.

Nagbinayloay og mga makabilib nga dunks ang duha, apan ang mga hurado maoy mihatag sa katapusang hukom ug gihatag nila ang korona ngadto ni Jones Jr.

Si Gordon sa iyang bahin wa kapugong sa iyang kaugalingon og miingon nga siya angayan nga mudaog tungod sa kalisud sa iyang mga dunks nga gibuhat.

Ang Magic forward mideklarar nga dili na siya musalmot pag-usab sa maong kompetisyon. Si Gordon diriyot usab midaog niadtong tuig 2016, apan napilde siya ni Zach Lavine sa Chicago Bulls.

“Tallest dude in the gym.”matud ni Gordon sa NBA.com. “Jumping over somebody 7-5 and dunking it, it’s no easy feat. What’d I get, a 47? Come on, man. What are we doing? It’s a wrap. I feel like I should have two trophies. So it’s over for that.”

Laing mga musalmot sa Slam Dunk mao sila si Los Angeles Lakers center Dwight Howard ug Pat Connaughton sa Milwaukee Bucks.

Sa laing bahin, hingpit na nga natilawan ni Buddy Hield sa Sacramento Kings ang Three-Point Shootout trophy human niya gipuhalan ang gunner sa Phoenix Suns nga si Devin Booker.

Misidlak usab ang sentro sa Heat nga si Bam Adebayo kinsa midaog sa Skills Challenge batok sa mas paspas nga guwardiya sa Brooklyn Nets nga si Spence Dinwiddie.