Salano, Martes gauna sa 10th SM2SM Run
CEBU, Philippines — Duha ka mga veterans nga sila si Richard Salano ug Christabel Martes ang gauna sa tagsa-tagsa nila ka dibisyon sa 10th SM2SM Run kagahapon didto sa SM City Cebu grounds.
Ang sakop sa Philippine Army nga si Salano, kinsa mirepresentar usab sa nasud sa miaging Southeast Asian Games, maoy labing paspas sa 21K race sa oras nga 1:09:11. Gipilde niya si Jerald Zabala, kinsa second placer sa oras nga 1:10:31, samtang si Prince Joey Lee maoy ikatulo sa oras nga 1:11:46.
Mikompleto sa top 10 finishers sa men’s division sila si Anthony Nerza (1:13:16), Florendo Lapiz (1:13:26) Joseph Arnel Emia (1:13:35), Jerome Casinillo (1:16:09), Joselito Dugos (1:16:32), Andy Toniacao (1:16:37) ug Michel Largo (1:16:56).
Sa pikas bahin, si Martes maoy reyna sa oras nga 1:29:09. Nagsunod kaniya sila si Lizane Abella (1:29:35) ug Evamie Villarin (1:35:13) sa ikaduha ug ikatulong luna.
Ang kinatibuk-ang top 10 sa women’s mao sila si April Rose Diaz(1:40:11), Kay Razel Cundangan (1:41:56), Josephine Rodriguez (1:41:57), Edna Jugarap (1:49:01), Linajane Aluba ( 1:49:31), Jessie Ejoc (1:49:32) ug Jonafe Grace Aragon (1:52:30).
- Latest
