Zion nakatilaw na og daog

CEBU, Philippines —  Nakatilaw na si No. 1 rookie Zion Williamson sa labing una niyang daog sa NBA dihang iyang gipangulohan ang New Orleans Pelicans  batok sa  Boston Celtics, 123-108  sa NBA kagahapon didto sa New Orleans Arena.

Sa ikatulo niyang duwa sa season, si Williamson mirehistro og double-double  sa iyang 21 puntos ug 11 ka rebounds.

Dili hinuon sama sa nag-unang duha niya ka duwa, gihatagan ni coach Alvin Gentry si Williamson og taas nga playing time human kini mipakita nga hingpit na  siyang nakarekober sa iyang injury sa tiil.

"I felt helpless the last two games not being able to help my team in the fourth quarter," matud ni Williamson sa Associated Press. "Being able to close it out tonight felt good."

Ang veteran nga si Jrue Holiday mihimo og 25 puntos alang sa Pelicans, samtang si Lonzo Ball mirehistro og career-high 15 ka assists.

Mismo si Celtics coach Brad Stevens ang miingon nga lisud pugngan si Williamson ug nakita niya nga mas  dominante kini samtang magkadugay sa liga.

Ang naparot nga Celtics gibidahan ni Kemba Walker nga miiskor og 35 puntos.