Kobe patay sa 'copter crash

CEBU, Philippines —  Ang NBA legend nga si Kobe Bryant namatay human nahagsa ang gisakyan niining helicopter nga mikalas sa kinabuhi sa tanang siyam ka mga pasahero, apil na ang anak niyang dalagita kagahapon.

Ang 41-anyos nga si Bryant mibiyahe uban sa 13-anyos niyang anak nga si Gianna ug lain pang pito ka mga pasahero ug tripulante sa dihang ang giluwanan nilang Sikorsky S-76 helicopter ming-dayb ug dayon misilaob ngadto sa usa ka dakong kayo didto sa bukirang bahin sa Calabasas, kasadpang bahin sa Los Angeles.

Walay bisan usa nga nakalingkawas sa maong makalisang nga trahedya. 

Ang five-time NBA champion ug two-time Olympic gold medalist giyukboan isip usa sa labing banggiitan  nga basketbolista sa kasaysayan.

Nunot sa maong mapait nga insidente, literal nga mihilak ang kalibotan sa basketbol. Minilyon ka fans gikan sa nakadaiyang dapit ang nagbangutan  sa kalit nga kamatayon ni Bryant nga gi-idolo sa kinabag-an dili lamang isip usa ka atleta, apan isip usa ka maayong tawo kansang prinsipyo ug positibong panglantaw sa kinabuhi nakatandog sa kinabuhi sa uban ilabi na sa bag-ong henerasyon sa mga basketbolista.

Apil na sa mga misaludo ni Bryant ug mipadangat sa ilang pahasubo ngadto sa pamilya niini mao ang kauban niyang mga legends sama nilang Magic Johnson, Michael Jordan, Shaquille O'Neal ug LeBron James.

"Laker Nation, the game of basketball & our city, will never be the same without Kobe," buhagay pa ni Johnson sa iyang Twitter.

Gihulagway ni Jordan si Bryant nga iyang igsuon ug nga dili mahulagway ang gibati niyang kasakit sa kalit nga pagpanaw niini.

"He was like a little brother to me. Words can't describe the pain I'm feeling," matud pa ni Jordan. "We used to talk often and I will miss those conversations very much."

Gibansagan nga 'Black Mamba', si Bryant nakasakmit og lima ka NBA titles sa mabulukon niyang karera nga nagsugod niadtong 1996 sa dihang nag-edad pa lamang siya og 17-anyos. Giumol niya ang tibuok 20 ka tuig niya sa liga nga natapos sa iyang pagretiro niadtong 2016 uban sa Lakers. Gawas niini, siya sab maoy nangu sa US team nga nakabira og gold medals sa duha ka Olympics niadtong 2008 didto sa Beijing ug 2012 didto sa London.

Milayat gikan sa high school deretso sa NBA, si Bryant mikulit og record isip labing bata nga starter sa usa ka duwa sa NBA ug labing bata nga midaog sa NBA Slam Dunk Contest sa edad nga 18 niadtong 1997.

Katumpang si O'Neal, gituboy ni Kobe ang Lakers ngadto sa talagsaong grandslam niadtong 2000 ngadto sa 2002. Hapit hinuon madiskaril ang iyang karera niadtong 2003 sa dihang gisikop siya didto sa Colorado gumikan sa kasong sexual assault nga gipasaka kaniya batok sa usa ka 19-anyos nga hotel employee. Nahusay ra hinuon ang maong kaso gawas sa korte inubanan sa pagpangayo niya og pasaylo sa publiko.

Niadto lang 2018, si Bryant nakadaog og Oscar award gumikan sa iyang animated short film nga "Dear Basketball"  nga maoy iyang love letter sa sport nga naghatag kaniya og dungog, tumang pagkasikat ug bahandi.