Elite Season 17: Tigers, Wolves gisugat og daog
CEBU, Philippines — Mipakita gilayon ang Tigers og sayong timailhan sa seryoso nilang kampanya alang sa titulo human ilang gipakuratan ang two-time defending champion Eagles, 88-85, pagsugod sa Elite Basketball Club-Cebu City Season 17 diha sa Visayas Glass gym sa Barangay Guadalupe. Si Chris Obeso mikadlit og 17 puntos ug 11 ka rebounds, samtang sila si John Cabahug ug Marsun Tabay mi-iskor og 16 matag usa alang sa Tigers nga mi-arangkada ngadto sa 38-31 nga bentaha sa halftime.
Ang Eagles miresbak pinaagi sa nagkayong 27-14 rally sa ikatulong kuwarter aron ilogon ang labaw, 58-52, apan ang Tigers milatos sa Eagles sa katpusang kuwarter, 36-27, aron pagipsot niini ngadto sa tres puntos nga daog.
Si Randy de la Pisa mikolekta og 23 puntos, samtang sila si JL Manila ug Jose Allan Dimco nagkumbinar og 21 puntos sa pilderong Eagles. Sa sayo pa, si Roy Quiachon mihipos og 21 puntos ug pito ka rebounds aron pangulohan ang Wolves ngadto sa 83-67 nga demolisyon sa Hawks.
Si Ian Cabañero miamot og 16 puntos samtang sila si Daboy del Rosario ug Paul Terrecampo midonar og 10 puntos matag usa alang sa Wolves nga mikastigo sa Hawks sa final half, 51-30, aron paglubong sa ilang kontra og 26 puntos.
- Latest
