Giannis misalida sa Paris

CEBU, Philippines — Gikawat ni Giannis Antetokounmpo ang pasundayag sa dihang mitali siya og 30 puntos ug milangkat og 12 ka rebounds aron pangulohan ang Milwaukee Bucks ngadto sa 116-103 nga kadaogan batok sa Charlotte Hornets sa makasaysayanong duwa sa NBA didto sa Paris, France kagahapon.

Ang labing unang duwa sa liga sa maong nasud nga gipahigayon didto sa Bercy Arena nakahakot og pipila ka mga sikat nga personalidad apil na ang duha sa labing adunahan nga football players sa kalibutan nga sila si Neymar ug Kylian Mbappé ug si Tony Parker, ang labing banggiitang French player nga nakapakita'g aksiyon sa NBA.

Dungan sa pagposte sa ikawalo nilang sagunson nga daog, giinat sab sa Bucks ang labing nindot nga record ning NBA season ngadto sa 40-6. Mao sab kini ang labing nindot nilang sinugdanan sa kasaysayan sa ilang prangkisa.

Gawas ni Giannis, mikuha sab og atensiyon si Eric Bledsoe pinaagi sa paghipos og 20 puntos sa Bucks.

Si Malik Monk maoy nangu sa Hornets uban ang 31 puntos. Ang garbo sa France nga si Nicolas Batum miiskor lang og singko puntos alang sa Hornets apan giabibahan siya og maayo sa iyang mga kababayan nga misinggit pa gani sa iyang pangan pagkahuman sa duwa.