Kasado na Casimero-Inoue unification bout

CEBU, Philippines — Kon walay motumaw nga mga kakulian, si WBO bantamweight champion John Riel 'Cuadro Alas' Casimero (29-4, 20KOs) gikatakada nga makigbinukbukay ni IBF/WBA 118-pound champion Naoya 'Monster' Inoue (19-0, 16KOs) sa Japan sa usa ka eksplosibong unification bout karong Abril 25 didto sa Las Vegas.

Segun sa taho ni Keith Idec sa BoxingScene.com, ang maong away magsilbeng debut ni Inoue uban sa Top Rank ni Bob Arum ug ipasalida sa ESPN live via satellite.

Wala pa'y binyu nga napilian sa pagka karon, apan ang megafight lagmit adto mahitabo sa Mandalay Bay Events Center.

Midugang si Idec nga dunay pormal nga pahibalo nga mahitabo kabahin sa sangka nilang Casimero ug Inoue sa umaabot nga mga semana.

Ang 30-anyos nga si Casimero, usa ka three-division world champion nga kanhi naghari sa IBF flyweight ug IBF/WBO light flyweight division, gibati og tumang kahinam sa dihang nakahibalo sa balita.

"It feels great. I want to shock the world," buhagay pa sa garbo sa Ormoc City sa iyang Facebook page.

Gisakmit ni Casimero ang WBO bantamweight title human miposte og makapakugang nga kadaogan pinagi sa 3rd round knockout batok sa inilog nga kampiyon nga si Zolani Tete (28-4, 21KOs) sa South Africa niadtong Nobiyembre 30 sa miaging tuig didto sa Birmingham, England.

Tulo ka semana sa wala pa kana mahitabo, si Inoue nakasugakod sa usa ka duguon ug brutal nga 12 ka hugna nga kumbati batok ni kanhi four-division world champion Nonito Donaire Jr. aron pagposte og unanimous decision nga kadaogan sa World Boxing Super Series bantamweight finals niadtong Nobiyembre 7, 2019 didto sa Saitama, Japan.

Human sa dalaygon niyang kadaogan batok ni Donaire, si Inoue mipirma og multi-fight contract uban ni Arum nga mao kanhi ang nagdala sa karera sa mas sikat nga kababayan ni Casimero nga si Manny Pacquiao.

Sa kasamtangan, ang kompaniya ni Pacquiao nga MP Promotions maoy promoter ni Casimero.