LJR Ventures, Park 'N Go Bakeshop milubong sa ilang mga kaatbang

CEBU, Philippines – Gipanglubong sa LJR Ventures ug sa Park 'N Go Bakeshop ang tagsa-tagsa nilang kaatbang alang sa ilang ikaduhang daog sa Power  Forty Basketball Tournament 50-above Sinulog Cup 2020.

Ang LJR Ventures mipilde sa Bob 'N Chino, 70-58 ug gipukan sab sa Park 'N Go Bakeshop ang Nacario Massage Parlor sa iskor nga 85-57 niadtong Martes sa gabii diha sa Inayawan Sports Complex.

Sa maong kadaogan, ang LJR Ventures ni Engr.   Edwin   Rabaya ug Park  'N  Go  Bakeshop ni Romy Rama kasamtangang nagsawo sa ikaduhang dapit sa standing sa managsama nilang 2-1 nga baraha.

Sila si Tony Ungria ug Celso Cabaluna parehong miiskor og 20 puntos aron pangulohan ang kadaogan sa LJR Ventures nga nahulga dihang misikit ang Bob 'N Chino, 47-46 human sa tulo ka kuwarter.

Nanginit ang LJR Ventures sa fourth period  ug hinay-hinay nilang giinat ang ilang labaw hangtod naangkon ang 12 puntos nga kadaogan.

Si Ricky Dayondon miambit og 11 puntos sa LJR Ventures.

Ang Bob 'N Chino nga adunay 1-2 win-loss record, gipangulohan sab ni Jun Abapo nga mipabuhagay og 21 puntos, samtang sila si Jun Ocampo ug Al Misa nagkumboya'g 24 puntos sa team nilang Bob Samson ug Chino Kalinga.

Sa laing bahin, si Teody Ebrado mikadlit og 20 puntos aron mangulo sa lima ka magduduwa sa Park 'N Go Bakeshop nga mikulit og double figures.

Sila si Eric Espinosa, Cesar Gaviola ug Eduard Buhay mitampo'g 16 puntos matag usa sa Park 'N Go Bakeshop nga sayo kaayong miarangkada aron moposte og 29-5 human sa unang 10 minutos sa duwa.

Wala pa matagbaw, giinat pa sa Park 'N Go Bakeshop ang ilang labaw ngadto sa 60-33 pagtapos sa third period.

Si Efren Mosqueda miamot og 12 puntos sa maong kadaogan.

Nagkumbinar og 33 puntos sila si Danny Dela Peña ug Allan Cabrera aron pangulohan ang Nacario Massage Parlor ni Edgar Nacario nga pabiling nangiwit sa standing sa ilang 0-3 nga baraha ning maong liga nga nahimo pinaagi sa paningkamot ni 'el presidente' Edwin Dejacto Sr. inabagan sa tanang miyembro sa Power Forty Ballclub.

Ang mga duwa ubos sa superbisyon ni league commissioner Dome Ozon sa abag nilang Paw Dejacto, Tedy Cabaluna ug Talyo Tamarra sa CEBRA.

PUNTOS MATAG USA

Unang duwa:

LJR VENTURES (70) – Ungria 20, Cabaluna 20, Dayondon 11, Sabandeja 9, Tudtud 7, Atillo 3.

BOB 'N CHINO (58) – Abapo 21, Ocampo 14, Misa 10, Cabatas 5, Ocariza 4, Mabatuan 2, Dumali 2.

Ikaduhang duwa:

PARK 'N GO (85) – Ebrado 20, Espinosa 16, Gaviola 16, Buhay 16, Mosqueda 12, Pestaño 5.

NACARIO (57) – Dela Peña 17, Cabrera 16, Zerna 8, Pacquiao 6, Alcordo 6, Cantarona 4.