Christmas bonus sa SEAG athletes mahatag na sa PSC
CEBU, Philippines — Mahatag na sa Philippine Sports Commission (PSC) ang nalangan nga Christmas bonus sa mga atletang Pinoy nga misalmot sa 30th Southeast Asian Games niadtong miaging buwan.
Human sa kapin usa ka bulan nga pagkadelatar, si PSC chairman William Ramirez mipahibalo nga iapod-apod na nila ang tag-P25,000 nga Christmas bonus ngadto sa mga sakop sa Philippine team sunod semana.
Gawas sa mga atleta, makadawat usab ang mga national coaches ug mga empleyado sa PSC nga mitabang aron magmalampuson ang kampanya sa nasud sa miaging SEA Games diin ang Pilipinas ang migawas nga overall champion.
Si Ramirez nangayo og pasaylo sa pagkalangan sa bonus ug mirason nga naglisud sila human miabot sa P400 million ang ilang gihatag sa Philippine SEAG Organizing Committee aron ibayad sa mga gastoan sa broadcasting sa mga duwa.
Gawas sa P25,000 sa tanang atleta, makadawat usab og laing P250,000 gikan ni Presidente Rodrigo Duterte ang mga gold medalists, samtang P150,000 ug P100,000 sa mga silver ug bronze medalists.
- Latest
