Bucks padayong nanghasi

CEBU, Philippines — Si Giannis Antetokounmpo mi-iskor og 29 puntos sa dihang giinat sa Milwaukee Bucks ang nagkadena nilang daog ngadto sa 18 ka duwa human gilabhan ang Cleveland Cavaliers, 125-108, sa NBA kagahapong adlawa.

Ang Bucks nanginahanglan na lang karon og duha ka daog aron tablahon ang franchise record alang sa labing taas nilang sagunson nga daog.

Apan ang 24-3 record nga gikuptan karon sa Bucks maoy labing nindot nga sinugdanan sa 52 ka tuig nga kasaysayan sa ilang koponan.

Kon ugaling ilang mapilde ang Los Angeles Lakers ug Dallas Mavericks sa sunod nilang mga duwa, hayan nga ilang tablahon ang 20 ka sunod-sunod nga daog nga giposte sa Bucks niadtong 1970-71 season.

Dominado kaayo sa Bucks ang duwa nga sa usa ka higayon naglabaw sila og 28 puntos sa ikatulong kuwarter. Wala na makaginhawa pa sukad niadto ang Cavs nga napilde sa ika-15 nga higayon sa miagi nilang 17 ka duwa.

Sa laing aksiyon, si Jimmy Butler mihipos og 27 putnos sa dihang gibuntog sa Miami Heat ang Dallas Mavericks, 112-118, sud sa overtime.

Nayayay ang kiting sa alas sa Dallas Mavericks nga si Luka Doncic sa unang kuwarter human matamaki niini ang tiil ni Miami guard Kendrick Nunn. Dili hinoon seryoso ang angol nga nahiaguman ni Doncic basi sa resulta sa x-ray.

Didto sa Toronto, si Pascal Siakam mitimbre og 30 puntos, 10 ka rebounds ug lima ka assists sa dihang gipahagba sa Raptors ang bisitang Brooklyn Nets, 110-102.

Si Norman Powell midonar og           25 puntos, sila si Kyle Lowry ug Marc Gasol dunay 17 puntos matag usa samtang si Serge Ibaka midugang og 12 puntos alang sa Raptors nga nagbitbit na karon og 17-8 nga baraha.