Ginebra usban sa NorthPort
CEBU, Philippines — Wa batia og kaluya si Christian Standhardinger ug desidido siya nga subling mutabang sa NorthPort Batang Pier nga mohimo sa ikaduha nilang sunod-sunod nga daog batok sa mas gipaboran nga Barangay Ginebra Kings sa Game 2 sa ilang best-of-five semis series karong gabii didto sa Smart Araneta Coliseum.
Si Standhardinger kinsa uban sa Gilas Pilipinas nga miangkon og gold medal sa SEA Games, mipugnit og 16 puntos ug 15 ka rebounds alang sa NorthPort nga mipakurat sa Ginebra sa Game 1 niadtong Biyernes, 124-90.
Ang 30-anyos nga si Standhardinger positibo nga mulampos sila ug makuha sa NorthPort ang labing una niining finals appearance sa kasaysayan sa franchise.
Gawas ni Standhardinger, nindot usab og gipakita ang import nga si Michael Qualls nga mihimo og 27 puntos sa Game 1.
Hinuon ang Batang Pier ni coach Pido Jarencio mangandam sa kusug nga pagbalik sa Ginebra.
Sama ni Standhardinger, ang mga pambato sa Ginebra nga sila si LA Tenorio, Greg Slaughter, Japeth Aguilar ug Stanley Pringle miduwa usab sa Gilas uban si coach Tim Cone ug silang tanan desidido nga mubawos karon.
- Latest