TNT, Meralco magpinaksitay na
CEBU, Philippines — Mag-unay ug dili mag-ilhanay nga igsuon ang TNT KaTropa ug Meralco Bolts kay sila ang mag-abot sa pagsugod sa semifinals sa PBA Governors' Cup karong gabii didto sa Smart Araneta Coliseum.
Ang Game-1 sa ilang best-of-five series gitakda sa alas-6:30 sa gabii.
Ang TNT ug Meralco pulos miharos sa ilang mga kaatbang sa quarterfinals. Ang KaTropa mitaktak sa Magnolia Hotshots, samtang ang Bolts mipalagpot sa Alaska Aces.
Ang duha ka koponan pulos mosandig sa ilang dekalibreng import nga sila si KJ McDaniels sa TNT ug Allen Durham sa Meralco. Si McDaniels gitan-aw nga mas adunay abilidad sa opensa, apan si Durham nga kanhi best import, mogamit sa iyang kasinatian aron tabangan ang Bolts.
Si KaTropa coach Bong Ravena masuwayan usab sa iyang pakigbangga ni legendary coach Norman Black.
Isip usa ka bagitong head coach, si Ravena miangkon nga usa ka dakong kalampusan niya kon mapilde niya ang koponan nga gidala ni Black nga iyang coach kaniadto dihang usa pa siya ka magduduwa.
- Latest