SM2SM Run 10 gilusad
CEBU, Philippines — Sa labing unang higayon sa kasaysayan sa usa ka running event dinhi sa Sugbo o dili ba kaha sa tibuok nasud, usa ka bag-ong awto ang i-raffle sa usa ka fun run.
Gipahibalo ni SM Prime Holdings Inc. Vice President Marissa Fernan atol sa usa ka press conference kagahapon didto sa Radisson Blu Hotel nga usa ka brand new Chevrolet Trax ang madaog sa raffle draw alang sa tanang mga partisipante sa SM2SM Run Year 10 nga gikatakda karong Pebrero 16, 2020 diha sa North Open parking area sa SM City-Cebu.
"We're now on our 10th year and hopefully we have more fun runs to come," matud pa ni Fernan.
Gawas sa awto, lain pang ipa-raffle mao ang 10 ka buok Samsung Note 10, 10 ka gift certificates alang sa usa overnight stay sa Radisson Blu Hotel ug 10 ka roundtrip Cathay Pacific tickets ngadto sa Hong Kong.
Kining tanan gawas sa P600,000 nga ganting salapi alang sa tanang top finishers matag kategoriya diin ang mga kampiyon sa 21K open mobulsa og P50,000 matag usa.
Ang registration magsugod karong Sabado, Disembre 14 diha sa second level sa The Northwing sa SM City Cebu duol sa Flawless.
Ang entry fee nagkantidad og P550 sa 4K, P650 sa 8K, P750 sa 12K ug P950 sa 21K. Ang early birds o kadtong magparehistro gikan sa Disyembre 13-31 dunay P100 nga diskwentro.
- Latest
