Dominanteng kadaogan

CEBU, Philippines — Natuman ang misyon sa Philippine team nga mabawi ang trono sa Southeast Asian Games ug nahimo kini nila sa dominanteng paagi.

Atol sa opisyal nga pagtapos sa kapin usa ka semana nga multi-sporting event kagahapon, ang mga atletang Pinoy miani og 149  gold, 117 silver ug 119 bronze medals.

Sa wala pa ang SEA Games, unang target sa mga Philippine sports official nga mosud bisan sa top three overall, apan mas mipakita sa ilang abilidad ang tanang atleta ug nakuha nila ang korona sa SEA Games nga katapusan nilang natilawan 14 ka tuig na ang milabay.

Ang 149 ka gold medals mao usab ang labing daghan nga  natigom sa Pilipinas sa kasaysayan sa SEA Games.

Milambo sab ang Pilipinas karon itandi sa 11 ka gold medals nga ilang natigom sa miaging 2017 SEA Games didto sa Indonesia.

Si Philippine Sports Commissioner ug chef-de-mission sa national team nga si William Ramirez nagkanayon nga sulit ang tanang sakripisyo ug dakong gasto sa kagamhanan tungod kay maayo ang gipakita sa mga atleta.

Si Ramirez nagkanayon nga napakita sa  nasud dili lang ang kamaayo sa mga atleta niini, apan lakip na usab ang kapabilidad niini nga mo-host og usa ka malampusong sporting events.

Una nang gikataho nga interesado ang nasud nga mosuway pag-bid alang sa hosting sa sunod Asian Games.

Human sa SEA Games, pipila ka mga atleta ang padayong suportaan sa PSC alang sa ilang kampanya sa  2020 Tokyo Olympics. Lakip sa mga gilauman nga modala sa bandera sa nasud sa Olympics mao sila si  gymnast Carlos Yulo, pole vaulter EJ Obiena, judoka Kiyome Watanabe, weightlifter Hidilyn Diaz ug skater Margielyn Didal.

Mokumpleto sa top three teams sa SEA Games mao ang Vietnam nga adunay 97 ka golds, 85 ka silvers ug 104 ka bronzes ug Thailand nga maoy ikatulo sa ilang 97-193-122 gold-silver-bronze medals.