Gilas miharos sa tanang bulawan sa basketball event
CEBU, Philippines — Giharos sa Philippine basketball team ang tanang gold medals sa upat ka events sa 30th Southeast Asian Games.
Daan na giisip nga lig-ong puwersa sa rehiyon sa Southeast Asia ang Pilipinas, apan kini ang unang higayon nga upat ka bulawan ang namina sa Phl Team.
Sa gilauman, naghari ang Gilas Pilipinas sa men's basketball event sa pagpangulo ni multi-titled coach Tim Cone. Giharos nila ang tanang duwa paingon sa ika-18 nilang gold medal.
Sa duwa nila sa finals batok Thailand, si June Mar Fajardo miiskor og 17 puntos, samtang unom pa niya ka mga teammates ang mirehistro og double-figures. Sila si LA Tenorio ug Christian Standhardinger mihipos og 16 puntos matag usa, sila si Vic Manuel ug Matthew Wright parehong miiskor og 14 puntos, si Stanley Pringle miamot og 13 puntos, samtang si Kiefer Ravena mitampo'g 10 puntos.
Midaog sab og bulawan ang Gilas women's team human gilubong ang Thailand sa iskor nga 91-71.
Kini ang labing unang bulawan sa women's team sa Pilipinas sa SEA Games sukad niadtong tuig 1981.
Sa sayo pa, ang Pilipinas miharos sa duha ka gold medals sa 3X3 basketball sa unang adlaw sa SEA Games sa miaging semana.
- Latest
